زیادہ تر بھارتی عوام پاکستان سے متعلق کیا رائے رکھتے ہیں ؟پڑھئے سروے رپورٹ کے حیران کن نتائج

0 142

نئی دہلی( این این آئی) بھارت میں کرائے گئے ایک تازہ مطالعے میں یہ سامنے آیا ہے کہ تین چوتھائی بھارتیوں کیلئے پاکستان خطرہ ہے،بھارتی ٹی وی کے مطابق یہ انکشاف پیو ریسرچ کی جانب سے جاری کردہ ایک رپورٹ میں کیا گیا ، بھارت میں گزشتہ برس کے وسط میں کرائے جانے والے اس سروے میں 2521 افراد سے ان کی رائے جانی گئی۔سروے میں شامل افراد کے تین چوتھائی حصے کا ماننا ہے کہ پاکستان، بھارت کیلئے ایک خطرہ ہے۔ 59فیصد کی رائے میں دہشت گردی پچھلے چند برسوں میں بڑھی ہے۔ تاہم اس مطالعے کے نتائج کی روشنی میں کہا جا سکتا ہے کہ مقبوضہ کشمیر میں فروری میں ہونیوالے حملے سے قبل بھی پاکستان اور دہشت گردی سے متعلق خدشات و خوف نمایاں تھا، تازہ جائزوں کے مطابق یہ امکان بھی ہے کہ ہندو قوم پرست جماعت بھارتیہ جنتا پارٹی اقتدار سنبھالنے کیلئے واضح برتری حاصل نہ کر پائے۔تاہم پلوامہ حملے کے تناظر میں روایتی حریف ملک پاکستان کے ساتھ سامنے آنے والی کشیدگی کے سبب بنیادی مسائل سے توجہ ہٹ کر قومی سلامتی سے متعلق امور پر مرکوز ہو گئی ہے۔اس صورتحال سے مودی اور ان کی قوم پرست جماعت کو غالباً فائدہ ہی پہنچا ہے۔ ناقدین کئی عرصے سے تنقید کرتے آئے ہیں کہ بی جے پی ملک کی مسلم اقلیت کے ارکان میں خوف بھڑکا رہی ہے اور ہندو قوم پرست ایجنڈے پر عمل پیرا ہے۔ بی جے پی اس الزام کو رد کرتی ہے۔ بھارتی کی آبادی 1.3 بلین افراد پر مشتمل ہے ، جس میں سے 14 فیصد مسلمان ہیں۔

Facebook Comments